2nd Placer

Si Rizal Bilang Aking Bayani, Ngayon at Bukas
Joana Pearl A. Baluyot
Quezon City High School

Paslit pa lamang ako’y nakasunod na siya
Mga leksyon niya’y pawang mga anino ko na
Ngunit sa aking paglaki’y mas lalo kong nakita
Tama lahat ang bawat inukit niyang salita

Galangin at ibigin ko raw ating wika
Upang hindi lumansa tulad ng isda
Habang ako’y lumalaki, nagkakaisip at tumatanda
Natanto kong isantabi ang mga salitang banyaga

Kami raw ang pag-asa nitong ating bayan
Kami nga na kung taguria’y mga kabataan
Sa amin magmumula at uusbong lahat ng katangian
Pagbabago’t pag-asa, sa balikat namin nakaatang

Aking ina ang nagpamulat sa akin
Ng mga bagay na tungkol sa bayani natin
Tulad niya’y ituturo at ipamamana ko rin
Mga bagay na ang lahat ay dapat isipin

Habang nabubuhay, siya’y aking bubuhatin at dadalhin
Kahit ako’y kitilin, hininga ko’y kanilang pawiin
Nabuhay akong siya ang nagturo at nagpangaral sa akin
At mamamatay akong siya lamang aking titingalain

Paulit-ulit mang siya’y siraan ng iba
Titulong bayani raw ay hindi para sa kanya
Kamukha ng kanyang aral, ipaglalaban ko siya
Kahit sa isipan nila’y mali, sa puso ko’y tama

Kaya naman hindi maarok ng isipan ko
Sa isang salita’y lahat magbabago
Buhay ng aking idolo’y biglang naglaho
Dahil lamang sa simpleng “FUEGO”!

Igapos man nila ang aking mga kamay gamit ang posas
Hanggang kumulubot aking balat na parang pasas
Siya pa rin, at siya lamang magbibigay sakin ng lakas
Si Jose Rizal, guro’t bayani ko noon, at sa marami pang bukas.